قصيده الشاعر / عمر الذيب ابو طارق

الدان و الشعر الشعبي بوادي حضرموت

قصيده للشاعر / عمر الذيب ابو طارق
~~~~~~~~~~~~~~~~~~~~~~

ياهاجسي بوصيك في رحلة سفر= رحله مسافتها تقدر بالف ميل

ون قلت لي اكثر نعم يمكن كثر =واللوم ماشي لوم لانقصة قليل

ودع رياض المجد بالبكره وطر =وركب تراي ستار من اخر مديل

ساعه ونص فوق السحب في الجو فر=وهبط بنا جده غبش قيم المقيل

لاوصلتها توك سرع لاتنتظر =توك الى الموقف الى حي السبيل

وطلع الى مكه بنيه واعتمر =وركع وصل في البيت لي ماله مثيل

ورجع الى جده تبضع واستقر=يومين والثالث وقل حان الرحيل

وذهب لبا كلكا لقا مكتب سفر=وحجز في اليمداء اذا عفشك ثقيل

ودع عروس البحر الاحمر واختصر=واركب في اليمداء وخل قال وقيل

واهبط في الريان بكره وانتظر=فتش قفاشيشك ولا خلصت شيل

واخرج من الصاله معد باتنتكر =واطلع الى البندر مع عابر سبيل

وان قابلك صاحب معد بايعتذر = بيوصلك لاداخل الديس الجميل

والشرج روحله عشيه منتشر = بتشوف لي ماشفت في الزام الدويل

بتشوف اسواقه خليه تعتكر=البن فيها والعسل والزنجبيل

والصبح شل نفسك وخل رحلتك بر=ساعه في الموتر وساعه عا الرجيل

وعبر بنا في بويش والريان مر=سلم على الجاويد ياكمن اصيل

والبسط في لدواس مابين القور=ومفرق احويره يجي بعده بقليل

وحسور من بعده تقشب بالشعر=تبغا لها سواق متعقل مهيل

قف في العقوبيه وبرد لايحر = مؤترك وتوكل وقل الله وكيل

ونكس لوادي العين وسرع واعتصر=بتشوف كمن حصن قدامه قبيل

ونشد على المعمور ويا بن بكر=لي صيتهم يرقل في الوادي رقيل

وقبل حوره جسر من فوقه تمر=هو نقطة العنوان لول والدليل

ومسيال دوعن لي يجي سيله عسر=وشرقي البنبشر له لازم تميل

سلم على متمت ومن عنده اشتر=حلوى نقيه مادخلها رانجيل

بتشوف عاليمنى السفوله وافتخر=بالشيخ بو ياسر ونايف له شبيل

وبجنبهم عندل ولحروم النور=لي نورهم يشعل على اليمنى شعيل

والبدع وعنيبات لازم تنذكر=عامدخل احريضه سكن كمن نبيل

ودخل بي احريضه وواصل واستمر=وحذر من التغريز في الرمل الهليل

قصع في الحدبه ببو اربع كفر=بين المثور والرويضات القبيل

ولتبرعه والقرن بامد النظر =وبادخل وادي خضر كله نخيل

واصل في الحدبه ورض لاتصطقر=لازاهر الباقيس عا خط السبيل

والرحم من بعده بكل طيب اشتهر=مابينهم ما شي مسافه للدليل

ودخل بنا لفحون عا الزحمه صبر=لاجيت في الوقفه وهيترقل رقيل

بتقابل السيله مع القرن الزور=والجدفره من بعدهم بثنين ميل

وقصع الى سريواه بازور النمر=بو مرعي الصمصوم لي يصهل صهيل

وسلم على خنفر الى شفته ظهر=وعلى عنق تعداد ماسيله يسيل

بي قابلك منخوب عا اليمنى وشر=للرحب وحروبه وشضيه مش قليل

وعبر بنا تحت النعيري ياعمر=وسرع شوي من قبل لي ضايقك ليل

بيجيك حصن الشكل مبني بالحجر=ربا عمر صالح ومن مثله قليل

وعبر حبب فرحان مثل المنتصر= ودخل بنا لاعمد في الفاي الظليل

في دار بو احمد تعصر وانتشر=ونشد على عادل ولد ماله مثيل

وهله واخوانه وهادي يعتبر=مثل الصبي في العين لي مابه بديل

وصعد لجول اكريث وعقد مؤتمر=وبرز مع هاجسك لي يزقل زقيل

ونظر الى عجزر بنظره وختصر=وقصع الى دار الضريبي عا الرجيل

وصعد ولا جيت الدبه مد النظر=بي قابلك جاحز كما شمراخ خيل

وعبر قبل حبره وسلم وافتكر=حبره بلد بلقار مافيها دخيل

وطمحان عا اليمنى بلد كمن زور= والوجر قدامه كما حيد الجزيل

سلام عا طمحان والوجر العسر=والمعمله من حيث وطن بن عقيل

وقصع لبامهشم على اليمنى ندر=والسمح جنبه والمبارك في الدليل

ودخل الى سده وسلم وعتصر=ونشد على صالح وقله مستحيل

ماتنتسي عا البال ياوعل النتر=وعبر بنا عا الحصن لي ماله مثيل

وصعد على خطك مع الوادي وسر=بتشوف بامحفوظ في القرن الدويل

قله مساك الخير ياشبل النمر=تعداد مايهمل من اسحابه هميل

بلغه بامشموس هم والباعمر=يومهم علي مالو من السكه قليل

والشرجه اللي قد لها صيت وخبر=هي والشراقي مثل ينبع والجبيل

وطلع بي الكادر ولا نزلناه قر= بنزل من المؤتر وبدحق عا الرجيل

بدحق على الرجلين في شعبة عمر=عا المقيف المشهور وسوام الحجيل

امن ومستامن وريض باعبر =لبغا لي اقامه ولا ورقة كفيل

سلام يا الشعبه مئه والفين كر=تتوارثه الاجيال جيلن بعد جيل

وسلام ياظيهر قبل عيني ظهر=ظيهر ظهر ماباه من سدي يميل

فيه الخوه والخال وطن واستقر=في سعف باواكد وبارميم الاصيل

اهل الكرم والجود في وقت العسر=لامنهم طاغي ولا فيهم ذليل

وحجال من تحته تسر القلب سر=لاخضرة تلقي قصبها خط نيل

واصل على رجلك دحق ماشي خطر=بايشترح خاطرك والقلب العليل

وانظر ولا شطيت عا اليمنى نبر=لي با الكرع من سمح شعبه مستغيل

وسوام ومقايف بها عندك خبر=والعلبط المشهور با الفاي الظليل

بتقابل الرضحين سمعي والبصر=رضحين صناع المروه والجميل

سلام يا الرضحين عد قطر المطر=يامطرح الناموس والشرع الطويل

سلام عاجولك وعرضك والشجر =وعلى الحصى والطين مره والنخيل

وسلام لك ياجول بالحمر صدر=لهلك وسكانك ولي تحت الصليل

سلام لك تعداد رملك والحجر=يبلغ لعبد الله وحافظ والدقيل

قصد الزياره جيت يا الهاجس ندر=وسكن ونم في دار منظرها جميل

فوق الحضيره دار مابين القور=لذكرت ساكنها مساء دمعي يسيل

بيت وظل فيها ثلاث ايام جر=كلم عوض احمد وقله مستحيل

ماتنتسي في القلب ملقيلك مقر=يامن على شانك ترحلنا رحيل

والليل يا الهاجس سمر طاب السمر=شف عادها رحله معي عشرين ميل

بن بدل القافي لانه ماسبر =من شان عا قافي خري نمسي نكيل

ذا فصل والثاني على ذاك الطرف=باقي معي وادي خري كله خضار

بسرح وبازوره وباتكلف كلف=بدحق على الرجلين في ظهر النهار

بمشي مع الوادي ولا جاني ملف =من تحت بامحفوظ باقصه يسار

وعلى يميني ارض فيها ماعرف=غير الكرم والجود والناس الخيار

من فوقها حصنين عا روس الدكف=تشهد على الماضي على حالي وقار

والعسكري سدي على ذاك الردف=ساكن في الدكوه وله تاريخ سار

باقابل الخربه فللها والغرف=من فوقها ماقس بلد كل التجار

سلام يا الخربه عدد نزل القنف=وعداد رعدانه وعد مانجم ثار

وصعدة جاني شرج سودان العكف=فيه الاسد ساكن ومن حوله نمار

قابلني الشرقي بطيبه والحتف=جنه في الطيبه وفي الشدات نار

لي اصدقاء واصحاب يا الهاجس وقف=ماباك تستعجل تقول الجو حار

سلم على الشرقي مئة مره ردف =كرر سلامك الف مره بافتخار

وقصع الى مخيه سوى والقرن شف=سلم على الاخوان لي في كل دار

وطلع مع الوادي وعا يسراك لف=مقصدك لا قريه زبينه عا اليسار

لا رباط باكوبن مع الهادف هدف=ونشد على صدقاء وعا صاحب وجار

بي رحبو بك الف ماحد بي خلف =ليهم لقو مقصد لكل عابر ومار

عا البونعم سلم رجاجيل الشنف=عا الشاب والشيبه ولي عدهم صغار

اعداد ما بارق في اجهامه يرف=والرعد يتحطرم في اطراف المثار

وقلهم لو كان قل المختلف=كله سببه البعد واسباب السفار

واصل الى ترمل ولنته متعرف=حط الزبيدي يوم عندك مستشار

ون قال باساعفك قله لتسعف=ماباك سعفي نختلف في كل شار

هب خلني وحدي معا الوادي نلف=باقابل اترمل حصونه والديار

صاحب معي فيها من اصحاب الجلف=له عندنا قدره وعزه واعتبار

بو عيضه الصمصوم بلاغ الهدف=قله مساك الخير ياذري النمار

ونظر على اليمنى مقابل يعترف=وسلم على جول المحطه وانت مار

ورجع الى خطك على ذاك الطرف=بتجي القريه لي لها تقدير حار

واصل على رجلك مع الوادي وطف=ودخل بي الحوطه وزر كمن مزار

واصل الى الحاله طريقك لتوقف=بلغ تحياتي لهم عا دار دار

وقلهم باقي في الرحله هدف=وديت بازور الخميله با النهار

برجع عليهم بعد ماحصل ملف=داعس مع المعقل على نفس المسار

صدفه كتبناها ويامحلى الصدف=لاقد صدر فيها من الهاجس قرار

والقصد من هذا التعب والمختلف=قصدي زياره زور كل قريه ودار

عا الجود والمعروف مره والشرف=قد زرتكم ياراس مالي والضمار

والعفو لا شي ضرب من بندقي طف=ما يكمل ابنادم ولا بيده قرار

مايكمل الا الله قاضي كل شف=الامر بيده والقضاء هو والقدار

الحمد له والشكر عد هادف هدف=للحج والعمره وعد رمي الجمار

واعداد ما بحره بموجاته زغف=واعداد ماميح وغرد طير فار

عا لرض هذه ياحسوفه با الحسف =من عدة ايامه مفارق في السفار

من صدق قال الذيب واقع معترف=قرب الوطن جنه واما البعد نار